As fontes de información bibliométrica son bases de datos e plataformas especializadas que recompilan, organizan e ofrecen acceso a publicacións científicas e os seus datos asociados (autoría, afiliación, referencias, citas recibidas, financiamento etc.). Ademais, moitas destas fontes proporcionan indicadores de impacto, colaboración, visibilidade e rendemento académico, tanto a nivel individual como institucional.
Entre as máis coñecidas a nivel internacional destacan Web of Science, Scopus e Dimensions, que permiten medir o impacto e a calidade da investigación a través de métricas como o factor de impacto, os cuartís, o índice h ou os índices de citas normalizadas. Xunto a estas, existen outras fontes relevantes como Google Académico, The Lens ou Dialnet, que ofrecen enfoques complementarios, con diferente cobertura xeográfica, temática e lingüística.
Estas fontes constitúen unha ferramenta esencial para a avaliación da investigación científica, a toma de decisións estratéxicas nas institucións, a xestión da carreira investigadora e a definición de políticas públicas en ciencia e innovación.
