A continuación recóllense unha serie de recomendacións para preparar a documentación necesaria de cara á avaliación da actividade investigadora. Estes pasos son útiles para garantir que toda a información estea actualizada, completa e conforme ás esixencias actuais do sistema de avaliación científica.
- Preparar a folla de servizos: se a investigación se realizou nun centro que non figura na folla de servizos, pode ser necesario preparar copias dos contratos, nomeamentos, credenciais de bolsas, etc., que acrediten o período de tempo e o grao de dedicación.
- Actualizar o teu currículum vitae abreviado (CVA); recoméndase utilizar o modelo da FECYT.
- Elixir as 5 publicacións máis relevantes e outras 2 de substitución.
- Solicitar a subida ao repositorio das publicacións que vaias presentar e ainda non figuren no repositorio. É obrigatorio xa que segundo a Lei 17/2022, do 5 de setembro, pola que se modifica a Lei 14/2011, do 1 de xuño, da Ciencia, a Tecnoloxía e a Innovación establécese que “deberá depositar una copia de la versión final aceptada para publicación y los datos asociados a las mismas en repositorios institucionales o temáticos de acceso abierto, de forma simultánea a la fecha de publicación.”
- Crear o teu identificador ORCID se aínda non o tes; tamén é obrigatorio neste proceso.
- Revisar e actualizar os teus perfís de investigador:
-
Perfil do Portal de Investigación: comproba se faltan publicacións. Non solicites documentos que poidan incorporarse a través de Dialnet, Scopus ou Web of Science se foron publicados recentemente, xa que é probable que aparezan nun prazo breve.
-
Perfil de Scopus: créase de forma automática, pero é conveniente comprobar que todas as publicacións que inclúe son correctas.
-
Perfil de Web of Science: tamén se crea automaticamente se hai publicacións indexadas nesta base de datos. Cómpre revisalo e validalo.
-
Perfil de Dialnet: solicita a incorporación dos documentos que poidan faltar. Lembra que en Dialnet só se cargan publicacións de produción científica de España e Iberoamérica, especialmente en lingua española.
-
Perfil de Google Scholar: este perfil xera automaticamente o número de citas dos documentos que indexa na web. Se xa está creado pode ser necesario revisar e limpar a información.
