A forma de redactar as referencias bibliográficas varía segundo o tipo de documento. Non obstante, todas as referencias constan destes tres elementos principais: autor, título e datos de publicación.
Autor
- Ponse comezando coas iniciais do nome seguidas dos apelidos.
- Varios autores: sepáranse con coma e antes do último ponse a conxunción “e”/ "y" / “and” segundo a lingua na que redactemos o traballo.
- Máis de 6 autore: ponse só o primeiro autor/a seguido de et al.
Exemplos:
B. Klaus e P. Horn
R. Fardel, M. Nagel, F. Nuesch, T. Lippert e A. Wokaun
M. Ito et al.
Título
- Os títulos dos artigos de revistas, capítulos de libros, informes, traballos presentados a congresos publicados etc., van entre comiñas e co texto en minúsculas, agás a primeira letra do título e o que indiquen as normas ortográficas da lingua na que se escriba.
- Os títulos de libros, revistas ou conferencia escríbense en cursiva, coa primeira letra de cada palabra importante do título en maiúscula.
Exemplos:
"Fiber-optic frequency shifter using a surface acoustic wave incident at an oblique angle"
Microwave Tonography: Global Optimization, Parallelization and Performace Evaluation
Datos de publicación
Segundo o tipo de documento incluiremos a información que corresponda da seguinte:
- Lugar de publicación
- Nome do editor
- Volume, número, páxinas
- Data
- Nos documentos electrónicos engadirase información sobre a data de acceso, DOI ou URL. Se unha referencia contén un DOI ou data de acceso e tamén unha URL, colócase primeiro o DOI ou a data de acceso e a URL ao final. No caso de que a referencia sexa da versión impresa pero teña unha URL, pódese poñer tamén ao final da referencia.
Exemplos:
New York, NY, USA: Wiley, 1994
vol.11, nº 2. pp. 115-117, Feb. 1986. [En liña]. Dispoñible en: http://ol.osa.org/abstract.cfm?URI=ol-11-2-115
New York, NY, USA: Springer, 2014. [En liña]. Dispoñible en: http://link.springer.com/book/10.1007%2F978-1-4939-0752-6
Nota:
Os datos para a elaboración das referencias bibliográficas obteranse principalmente dos documentos aos que se refiren e transcríbense na forma e idioma no que aparecen, pero tendo en conta que algúns elementos podemos adaptalos á lingua empregada na redacción do noso traballo.
Nesta guía os exemplos están adaptados ao galego, pero se o noso traballo está redactado en inglés, faremos os seguintes cambios:
- Nos títulos de artigos de revistas, capítulos de libros etc., que van entre comiñas a coma precederá ao peche das comiñas.
- Na abreviatura que precede ao número das revistas poñerase no.
- As datas completas indicaranse coa estrutura Month abrev. Day, Year.
- En liña = Online
- Dispoñible en = Available
- Consultado = Accessed
- Presentado en = Presented at
