Como localizar patentes

A Oficina de I+D apoia a comunidade investigadora na protección e na valorización dos seus resultados de I+D+i, co obxectivo de facilitar a transferencia do coñecemento xerado nas tarefas de investigación, coa vista posta na sociedade e no tecido industrial da contorna. Presta o apoio necesario para a elección da mellor estratexia de protección dos resultados da investigación, con vistas á súa futura explotación, levando a cabo os procedementos de xestión e tramitación de títulos e rexistros nas súas diferentes vías.

A Normativa de Propiedade Industrial e Intelectual da Universidade de Vigo establece que a titularidade dos resultados das investigación desenvolvidas pola comunidade investigadora, froito da súa relación laboral coa Universidade de Vigo, corresponderá á institución; as persoas investigadoras conservan a consideración de inventor/a ou autor/a. Esta normativa pretende: 

• Fomentar as actividades de investigación dentro da comunidade universitaria.
• Establecer mecanismos para a explotación dos resultados propios da investigación e dos resultados froito de colaboracións con outras entidades públicas ou privadas.
• Reforzar a posición da universidade como entidade líder na xeración de novos proxectos empresariais baseados na innovación.

O Portal da Investigación da Universidade de Vigo recolle os resultados de investigación da súa comunidade científica, entre os que se atopan as patentes e solicitudes de patente. Todas as patentes están ordenadas por ano e dentro de cada ano polo título.

Ao premer en cada título, ábrese unha páxina que recolle:

• Título da invención
• Nomes dos inventores/as
• Solicitante/s: pode ser unha institución como a Universidade de Vigo ou unha empresa
• Siglas que indican o ámbito de protección da patente: 
  • ES: españolas
  • EP: europeas
  • WO: internacionais
• Códigos de solicitudes de patente e/ou de publicación de patente, xunto coas súas datas
• Resumo
• Base de datos da oficina de patentes onde se rexistrou; no caso de España é Invenes, que recolle tamén as solicitudes de patente europeas e as internacionais vía PCT
• Ligazóns ao texto completo no caso de estar dispoñible