Repositorio institucional Investigo

Investigo é o repositorio institucional da Universidade de Vigo que ten como obxectivo recoller, difundir e preservar en formato dixital a produción científica do seu persoal investigador.

O repositorio está ligado aos procesos de avaliación da produción científica da Universidade de Vigo e recolle os artigos, libros, capítulos ou partes de libros, teses e documentos derivados de congresos e comunicacións científicas elaborados polo seu persoal investigador.

O depósito en Investigo ofrece as seguintes vantaxes:

• Da visibilidade á investigación realizada pola institución e os seus membros.
• Incrementa o uso e impacto das publicacións ao chegar a unha audiencia máis ampla.
• Garante a preservación a longo prazo.
• Facilita o acceso perpetuo aos traballos mediante ligazóns permanentes.
• Garante unha correcta xestión dos dereitos de autor.
• Permite cumprir con mandatos institucionais e requirimentos dos organismos de financiamento.
• Permite aos investigadores/as dispoñer dun punto de acceso unificado á produción científica.​​

A Universidade de Vigo conta cunha política institucional de acceso aberto á produción científica. No ano 2018 asinou a Declaración de Berlín comprometéndose firmemente co movemento de acceso aberto.

A xestión e mantemento do repositorio correspóndelle á Biblioteca Universitaria.