Como afrontar o TFG

Consulta o regulamento do teu grao no que se refire á defensa do TFG para ver o tempo de exposición, os criterios de cualificación e avaliación etc.

A defensa do TFG é unha parte esencial do proceso que convén que non descoides. Á hora de preparar a exposición é recomendable elaborar un guión previo cos contidos a desenvolver seguindo este esquema:

• Introdución: formulación breve do tema, propósito e obxectivos. Debe ser curta, motivadora e precisa.
• Desenvolvemento: explica os contidos con detalle e arguméntaos (inclúe a metodoloxía, os resultados obtidos e a súa interpretación).
• Conclusión: debes usar os minutos finais para salientar conceptos que permitan recapitular os puntos máis importantes.

Podes apoiar a túa exposición con calquera tipo de material visual (diapositivas, póster etc.) sempre que cho permita o regulamento e a tecnoloxía da aula. 

A presentación visual non é a versión reducida do TFG senón un apoio á exposición. A súa estrutura debe ser un reflexo da propia estrutura da exposición, e non debe conter un número excesivo de diapositivas: un número suficiente pero non excesivo para saturar a presentación.

Existen diversos programas que permiten crear presentacións visuais como PowerPoint (Microsoft), Impress (OpenOffice), Google Slides etc. Ademais, dispós doutras ferramentas que normalmente teñen unha versión gratuíta e outra de pago, entre elas: Genially, Emaze, Canva, Prezi, Knovio, Visme, Haiku Deck e ZohoShow. 

Se optas por unha presentación con diapositivas ten en conta estas recomendacións relativas ao deseño e estilo:

• Non cargues as diapositivas con exceso de información. Reduce o número de ideas de cada diapositiva e focaliza a atención nos aspectos claves.
• Aplica a regra de 6x6: non debe haber máis de 6 liñas e en cada liña non máis de 6 palabras.
• Usa un tamaño de letra que sexa doado de ler. En xeral para as tipografías máis habituais o tamaño 30 é adecuado. 
• Elixe un grupo de fontes tipográficas sinxelas e elegantes, evitando as tipografías de fantasía. 
• Busca sempre cores con alto contraste para destacar o texto do fondo.
• Mantén un equilibrio entre imaxe e texto, e procura que as imaxes sexan acordes co contido e engadan valor, intentando escoller as de maior calidade.
• Usa gráficos, táboas ou figuras que sinteticen as ideas.
• Utiliza con mesura as animacións. 
• As transicións entre diapositivas deben ser o máis sinxelas posible.

Para a defensa do TFG non basta con preparar o discurso e unha presentación visual. Debes ensaiar e ensaiar para lograr unha boa exposición oral e ter en conta estes consellos relativos á linguaxe verbal e non verbal: