Ir ao contido principal
Universidade de Vigo
BIBLIOGUÍAS
Universidade de Vigo

Acordos editoriais para publicar en acceso aberto

Acordos vixentes na Universidade de Vigo

Na actualidade están vixentes, na Universidade de Vigo, acordos transformativos asinados con varias editoriais para financiar a publicación en acceso aberto. 

O CISUG (Consorcio Interuniversitario do Sistema Universitario de Galicia), formado polas universidades de Vigo, Santiago de Compostela e A Coruña, e a Xunta de Galicia, asinou acordos transformativos coas editoriais Cambridge University Press e Oxford University Press.

A CRUE-CSIC, coa colaboración do CISUG, asinou acordos transformativos coas editoriais: Elsevier, Wiley, Springer, ACS (American Chemical Society), RSC (Royal Society of Chemistry) e IEEE (Institute of Electrical and Electronics Engineers).

Ademais, a Universidade de Vigo ten un acordo coa ACM (Association for Computing Machinery). 

Ademais dos acordos transformativos, existen outros modelos editoriais que permiten publicar en acceso aberto sen custe. É o caso de SCOAP3 (Sponsoring Consortium for Open Access Publishing in Particle Physics) e de editoriais que ofrecen descontos para publicar en acceso aberto con condicións diferentes segundo os casos, por exemplo, a editorial MDPI.

Os acordos transformativos

Os acordos transformativos son contratos negociados entre as bibliotecas ou consorcios de bibliotecas e as editoriais que transforman o modelo actual de negocio da publicación de revistas académicas. Caracterízanse por usar os fondos tradicionalmente destinados ás subscricións (pagar para ler) a un novo modelo no que, ademais de pagar para ler, inclúe o prezo de publicar en acceso aberto (Article Procesing Charges ou APC). É o que se coñece como Read & Publish agreements.

Este tipo de acordos inscríbense no marco dos cambios que a Ciencia Aberta (Open Science) implica para o desenvolvemento da comunicación científica. O seu obxectivo é acelerar a transición cara ao acceso aberto (OA), facilitar o cumprimento dos requirimentos das axencias financiadoras e incrementar a visibilidade da investigación.

As súas características segundo ESAC (Efficiency and  Standards for Article Charges) son:

  • Trátase de acordos transitorios, que buscan facilitar o camiño cara a un escenario no que a comunicación científica sexa en acceso aberto.
  • A propiedade intelectual (copyright) dos textos queda en mans dos autores e autoras.
  • Deben facerse públicos os termos e condicións do contrato coas editoriais para favorecer a súa transparencia.
  • Os gastos deben ser “neutrais”, equivalentes aos gastos por subscrición, evitando así o dobre pago (ou “double dipping”).
  • Deben especificarlles con claridade aos autores/as as condicións ás que deben acollerse para poder publicar.

ESAC mantén un rexistro no que se recollen os acordos transformativos a nivel internacional.

  • Publicar sen custo os artigos en acceso aberto e cumprir os requirimentos das axencias financiadoras.
  • Estar exento/a do pago por procesamento de artigos (APC) nesas editoriais.
  • Conservar os dereitos sobre as obras e protexelas con licenzas Creative Commons.